ფხვიერი ნამცხვარი საყვარელი ხილფაფით. გემრიელი, არომატული და მოსამზადებლად მარტივია

397

შემოგთავაზებთ ფხვიერი ცომისა და ხილის არომატით გაჯერებული უგემრიელესი ნამცხვრის რეცეპტს.

ცომის მოსამზადებლად დაგჭირდებათ შემდეგი ინგრედიენტები:

  • ფქვილი 550 გრ
  • კარაქი 300 გრ
  • შაქარი 200 გრ
  • 1 ცალი კვერცხის გული
  • კვერცხი 1 ცალი
  • ძმარი 9%-იანი 1 ჩ. კ./სოდა ნახევარი ჩ. კ.
  • ვანილი
  • მარილი მწიკვი
  • თქვენთვის სასურველი ხილფაფა

მომზადების წესი:

  1. ოთახის ტემპერატურის კარაქი მოათავსეთ ღრმა თასში.
  2. დაამატეთ შაქარი, ვანილი, მწიკვი მარილი და ათქვიფეთ მიქსერის მაქსიმალურ სიჩქარეზე.
  3. შეათქვიფეთ 1 ცალი კვერცხი, 1 ცალი კვერცხის გული და სოდისა და ძმრის ნარევი.
  4. მიქსერი გადაიყვანეთ დაბალ სიჩქარეზე და ნაწილ-ნაწილ შეურიეთ გაცრილი ფქვილი. როდესაც ცომი გასქელდება, გადმოიტანეთ ფქვილმოყრილ ზედაპირზე. ცომს ზელთ ხელით. უნდა მიიღოთ რბილი ცომი.
  5. მზა ცომი გაყავით ორ ნაწილად. თითოეულ ნაწილს  შემოახვიეთ ცელოფანი და 30 წუთით შედეთ მაცივარში.
  6. აიღეთ თქვენი საცხობი ფორმის შესაბამისი ზომის 2 ცალი პერგამენტის ქაღალდი. თითოეულს მოაყარეთ ფქვილი და  ცომის გუნდები გააბრტყელეთ 3-3 მმ სისქის ოთხკუთხედ ფენებად. შემდეგ აიღეთ ქაღალდით და გადაიტანეთ საცხობ ფორმაზე.
  7. ცომი დაჩხვლიტეთ ჩანგლით და შედეთ 200 გრადუსზე გაცხელებულ ღუმელში. გამოსაცხობად დასჭირდება 10-15 წუთი. შემდეგ გამოაცხვეთ მეორე ფენა.
  8. ოქროსფრად დაბრაწული ფენები გააგრილეთ. ნაპირები გაასწორეთ და ჩამონაჭრელები დაფშხვენით.
  9. პირველ ფენას წაუსვით თქვენთვის სასურველი ხილფაფა. ძალიან უხდება შინდის ან ვაშლის ჯემი. ეს თქვენს გემოვნებაზეა დამოკიდებული. შემდეგ დაადეთ მეორე ფენა და წაუსვით ხილფაფა. ზემოდან მოაყარეთ ნაფშხვენები.
  10. უგემრიელესი, ფხვიერი, ხილის არომატით გაჯერებული ნამცხვარი გააჩერეთ 1 საათი.

გემრიელად მიირთვით და ისიამოვნეთ!