შემოგთავაზებთ ხაჭოს ბაზაზე მომზადებული უნაზესი ცომის რეცეპტს. ცომით შეგიძლიათ გამოაცხოთ სხვადსახვა ფორმის ორცხობილები და გაახაროთ თქვენი პატარები.
მოსამზადებლად დაგჭირდებათ შემდეგი ინგრედიენტები:
- კარაქი 150 გრ
- ხაჭოს 200 გრ
- ფქვილი 250 გრ
- შაქარი 100 გრ
- მწიკვი ვანილი ან რამდენიმე წვეთი ვანილის ესენცია
მომზადების წესი:
- ცივი კარაქი გახეხეთ, დაამატეთ შაქარი და ხაჭო.
- ნაწილ-ნაწილ დაამატეთ გაცრილი ფქვილი და მოზილეთ ცომი.
- მზა ცომს შემოახვიეთ პარკი და 2 საათით შედეთ მაცივარში. შეგიძლიათ ცომი გაამზადოთ ღამით და ლამაზ-ლამაზი, გემრიელი ორცხობილები გამოაცხოთ დილით.
- საცხობ ფორმაზე დააფინეთ პერგამენტის ქაღალდი.
- ღუმელი ჩართეთ 200 გრადუს ტემპერატურაზე.
- ცომი გადმოიტანეთ ფქვილმოყრილ ზედაპირზე და გააბრტყელეთ 3 მმ სისქის ფენად. დაჭერით თქვენთვის სასურველ ფორმებად და დააწყვეთ საცხობ ფორმაზე.
- გამოსაცხობად დასჭირდება 10-15 წუთი.
თუ გსურთ, თბილ ორცხობილებს მოაყარეთ შაქარი ან დარიჩინი. გემრიელად მიირთვით!
